Inihayag ng Philippine National Police (PNP) na mahigit P61 million na halaga ng hinihinalang iligal na droga ang nasamsam sa iba’t ibang operasyon sa buong bansa, kasabay ng pagkakaaresto ng limang suspek.
Ayon sa PNP, isa sa mga unang insidente ay sa Patnanungan, Quezon kung saan isang mangingisda ang nakatagpo ng limang plastic bag na may laman na 6.5 kilo ng hinihinalang cocaine na nagkakahalaga ng P34.5 million. Pinaniniwalaang inanod lamang ang mga ito at kalaunan ay isinuko sa mga awtoridad.
Sa Zamboanguita, Negros Oriental, naaresto ng anti-narcotics operatives ang isang high-value target sa buy-bust operation at nakumpiska ang mahigit isang kilo ng hinihinalang shabu na nagkakahalaga ng P7 million.
Samantala, sa Bacolod City, tatlong suspek ang nadakip at isang kilo ng hinihinalang shabu na nagkakahalaga ng P6.8 million ang nasamsam. Sa hiwalay na operasyon sa Zamboanga City, dalawang kilo pa ng hinihinalang shabu na may halagang P13.6 million ang nakumpiska.
Isinagawa ang mga operasyon sa koordinasyon ng Philippine Drug Enforcement Agency (PDEA) bilang bahagi ng kampanya kontra iligal na droga ng pamahalaan.
Pinuri ng mga opisyal ang suporta ng publiko at ang koordinasyon ng mga ahensya sa matagumpay na operasyon, na ayon sa kanila ay mahalaga upang mapigilan ang pagkalat ng droga sa mga komunidad.
Tiniyak naman ng PNP na isasailalim sa tamang pagsusuri at dokumentasyon ang mga nakumpiskang ebidensya habang inihahanda ang mga kaukulang kaso laban sa mga naarestong suspek.
