Pigsugo kan Philippine National Police (PNP) sa gabos kan saindang mga unit sa bilog na nasyon na magin preparado asin alerto sa posibleng epekto asin panlalamasa kan Bagyong Wilma.
Komo preparasyon, pigsugo an kada istasyon asin regional office na magsagibo kan kinakaipuhan na preparasyon tanganing maproteheran an buhay asin pagsasadiri kan mga namamanwaan.
Sigun ki Acting PNP Chief PLTGEN Jose Melencio Nartatez Jr., an PNP an magpapahigot kan saindang koordinasyon asin pagtatabangan sa manlaen-laen na local government units (LGUs) asin iba pang concerned government agencies tanganing masierto an kasalbaduhan kan publiko sa hampang kan huma kan bagyo.
Pigsaysay ni Nartatez na an gabos kan mga personnel kan PNP an naka-alerto na asin nakapreparar an bilog na puwersa para sa posibleng preemptive evacuation kan mga residente sa mga lugar na direktang maaapektaran asin para sa prepositioning kan mobility assets siring kan mga lunadan asin rescue assets siring kan mga bangka asin medical supplies.
Siringman, pig-enkaminar kan PNP an gabos kan mga komunidad na magtinir na alerto, magdangog asin magsunod sa mga weather updates na pigtatao kan state weather bureau, asin makipagtabangan sa mga otoridad tanganing masierto an kasalbaduhan kan gabos.
