PNP pig-asegurar na kakasuhan an siisay man na mapakuriyat nin Fake News lalo sa mga School Shooting

Nagpatanid an Philippine National Police (PNP) sa mga nagpapalakop nin fake news na nagtatao nin takot sa publiko.

Segun kay PCol. Allen Rae Co, an hepe kan PNP Public Information Office, nagpapadagos na an saindang imbestigasyon dapit sa bagay na ini.

Nangapudan man ini sa mga peryodista na magin maingat sa pagdistribwer nin impormasyon kun sain maninigo na maingat na helingon an impormasyon bago ihiras.

Sinabi man kaini na dae sinda maduwa-duwa na kasuhan an mga nasa likod kan pagpalakop nin salang impormasyon.

Magigirumduman na nagkua nin kritisismo an nagkapirang peryodista huli sa pagpalakop kan osipon na igwang soboot mass shooting sa sarong eskwelahan sa Cavite City, na dae palan totoo.