NAGA CITY- Pigklaro ngonyan kan PNP Camaligan an manungod sa sinasabing insidente nin panghahabon suboot kan 14 persona asin kan esposo kan alkalde kan nasambitang banwaan kan mga gamit sa pagsisira.
Sa entrevista kan Bombo Radyo Naga ki PO1 Jennifer Bables, hale sa PNP Camaligan, sinaysay kaini na nag-apod sa saindang hepatura si Camaligan Mayor Marilou Hirose tanganing ipaabot na iligal na kinakarga kan nagkapirang mga parasira an pangki hale sa saiyang vessel sa Fishing Port sa barangay Dugcal.
Tulos man na nagpasiring sa lugar an mga kapulisan asin inimbitaran sa hepatura an secretary kan Dragon Maru Company na si Hosie Tomita, 58-anyos asin an 13 iba pa tanganing matawan nin klaro an nasambitang insidente.
Sigon ki Tomita, pigsugo suboot sinda ni Uzo Hirose, an esposo kan alkalde tanganing ikarga sa truck an mga pangki na pigkakarkulong nagkakantidad nin P1 milyon tanganing ipabakal sa Laguna.
Sigon ki Bables, dae aram ni Mayor Hirose an sinasabing direktiba kan saiyang esposo.
Dae man sinunadan nin kaso an esposo kan alkalde siring man an mga parasira huli sa conjugal property suboot an nasambitang mga gamit na kinakarga sa truck.
