NAGA CITY – Arestado an walo katao sa Inida makalihis an karumal-dumal na paggadan sa sarong politiko na naglalaban sa derichos kan mga nasa laylayan.
Sa report, tinadtad nin saksak an state boss kan Bahujan Samaj Party (BSP) na si K. Armstrong gamit an machete asin karit harani sa istaran kaini sa Southern City kan Chennai kan Biyernes nin pagkabanggi.
Anom na kalalakihan lunad kan motorbike an nag-atake ki Armstrong mantang ini an nakikipag-ulay sa mga amigo asin taga-suporta harani sa harong kaini sa Tamil Nadu state capital. Tolos na nakadulag an mga lalaki antes pa makagibo nin paagai an mga tawo.
Nagprotesta man sa mga tinampo an mga tagasuporta ni Armstrong tanganing maghagad nin hustisya sa pagkagadan kaini. Sigun ki Senior Chennai police officer Asra Garg, walong suspek an presenteng nagsasairarom sa interrogation makalihis an “preliminary investigation”.
Pigkondenar man ni Mayawati, national head kan Bahujan Samaj Party an pag-atake. Pig-enkaminar man ni Tamil Nadu Chief Minister M.K. Stalin an pulisya na imbestigarang marhay an kaso.
