Mariing kinondena ni Pope Leo ang pagpatay umano sa libu-libong nagpoprotesta sa Iran at muling iginiit ang kanyang paninindigan laban sa anumang uri ng digmaan.
Ginawa ng Santo Papa ang pahayag sa isang press conference habang pauwi sa Roma matapos ang kanyang pagbisita sa apat na bansa sa Africa. Ayon sa kanya, hindi katanggap-tanggap ang pagkitil ng buhay ng mga inosenteng mamamayan, at bilang isang espiritwal na lider ay hindi siya maaaring sumuporta sa karahasan at digmaan.
Ang kanyang pahayag ay kasunod ng komento ni U.S. President Donald Trump na kinuwestiyon kung bakit hindi agad nagsalita ang Santo Papa hinggil sa sitwasyon sa Iran. Bagamat hindi ito direktang sinagot, iginiit ni Pope Leo ang kanyang matagal nang paninindigan laban sa digmaan at karahasan.
Binigyang-diin din niya ang patuloy na tensyon sa pagitan ng Estados Unidos at Iran na aniya’y nagdudulot lamang ng matinding paghihirap sa mga ordinaryong mamamayan, habang inilarawan ang umiiral na ceasefire bilang magulo at walang malinaw na direksyon.
Samantala, ipinagtanggol din ng Santo Papa ang kanyang pagbisita sa ilang bansa sa Africa, kung saan sinabi niyang layunin ng Vatican na tahimik na itaguyod ang katarungan at pagbutihin ang kalagayan ng mga tao sa halip na maglabas ng hayagang pagkondena.
Sa huli, nanawagan si Pope Leo sa mga lider ng mundo na unahin ang kapakanan ng mga sibilyan at itaguyod ang mapayapang solusyon sa halip na umasa sa lakas-militar.
