Pinangenutan ni Philippine Ports Authority (PPA) General Manager Jay Santiago an inspeksyon sa Batangas Port kan nakalihis na aldaw nin Lunes tangani na masierto an preparasyon kan mga pasilidad asin operasyon, siringman an seguridad kan mga pasahero sa gabos kan pantalan sa nasyon ngunyan na holiday season.
Nagkaigwa nin media conference kun saen sinaysay ni Santiago na an pangenot na problema iyo an kakulangan kan mga barko.
Bagaman igwang online ticketing, posible pa man na magin problema an kakulangan kan barkong malulunadan kan mga pasaherong may tiket na.
Sigun sa saiyang pahayag, kan mga nakalihis na taon, an pinakahalangkaw na passenger volume sa Batangas Port an nasa 21,000 sana. Alagad kan nakalihis na aldaw nin Domingo, nag abot na ini sa labi sa 30,000, na buot sabihon, igwang 50% paglangkaw sa passenger volume.
Huli man digde, kaipuhan soboot na magsimbag an domestic shipping industry sa paagi kan pagdagdag kan mga barko.
Hinahagad ni Santiago sa mga shipping lines asin sa Maritime Industry Authority (MARINA) na magdagdag pa nin mga barko, bako sana sa Batangas kundi sa manlaen-laeng pantalan sa bilog na Pilipinas.
Pangapudan man ni Santiago sa mga biyahero na labaan an saindang pasensya, asin pig asegurar kan PPA na gigibuhon an gabos tangani na magin komportable an saindang paghahalat nin mga barko tangani makaabot sinda sa saindang destinasyon ngunyan na kapaskuhan.
Sinabihan man ni Santiago an pamayuhan kan Batangas Port na siertuhon an maayos na air-conditioning, bastante na charging stations, makusug na internet, libreng water refilling stations, asin malinig na mga palikuran.
