Ipigbuyagyag kan House Prosecutor asin Bicol Saro Partylist Rep. Terry Ridon na igwa sinda nin bagong ebidensya laban ki Bise Presidente Sara Duterte manungod sa mga assets na dae ninda pigdeklara kan saindang agom sa saindang Statement of Assets, Liabilities, and Net Worth (SALN) poon 2007 hasta 2024.
Durante kan paglansar kan “Bantay Impeachment” sa Claret School, sinabi ni Ridon na an mga assets na ini rehistrado sa mga ahensya kan gobyerno alagad dai nagluwas sa SALN submissions kan Bise Presidente.
An bagong evidenciang ini gagamiton sa pagpatunay kan reklamo manungod sa “unexplained wealth” o tinatagong yaman, saro sa apat na reklamong inaatubang ni Duterte.
Ineksplikar ni Ridon na an mga dokumentong ini dae nai-table kan mga nakaaging House hearing, kun kaya pwede ining ikonsiderar na bago asin pormal na ikakaag sa pretrial brief na isusumiter sa Senado sa masunod na semana.
Sinabi man kaini na mayo nin ley na nagbabawal sa prosekusyon na mag-introdusir nin bagong ebidensya bago matapos an pretrial stage.
Sa ibong na lado, inomaw ni Ridon si House Prosecutor Joel Chua, na iyo an nagbuyagyag kan nasabing bagong evidencia.
Apwera sa dae maipaliwanag na yaman, inaatubang man ni VP Duterte an mga reclamo nin korapsyon, salang paggamit kan pondo kan publiko, asin huma sa buhay kan mga halangkaw na opisyales kan nasyon.
