Nagpadagos an impeachment trial ni Bise Presidente Sara Duterte, kun sain nagpokus an House prosecution panel sa transaksyon nin P112 milyon hale sa DepEd.
Ini konektado sa dating Special Disbursing Officer kan DepEd na si Edward Fajarda asin dating Deputy Commander kan Vice Presidential Security and Protection Group na si Col. Dennis Nolasco.
Nagkaigwa nin mainit na diskusyon sa pag-ultanan kan prosekusyon asin depensa manungod sa pagkakaiba kan mga terminong ‘turn-over’ asin ‘disburse’ sa pagpapaliwanag kan paghiro kan pondo.
Sa ibong kan argumento, kinumpirma ni Trial Presiding Officer Chiz Escudero na tunay na naresibe ni Nolasco an nasabing kantidad.
Hinagad man kan prosekusyon na akuon kan depensa na an pondo itinao ni Fajarda ki Nolasco base sa direktiba ni Bise Presidente Duterte.
Alagad, pinaglinaw kan depensa na mayo nin direktang kaaraman si Fajarda sa aktwal na paggasto kan pondo, dawa pa siya an nagpirma sa nagkapirang sertipikasyon.
Kadaklan sa 13 request for stipulation kan prosekusyon inako kan depensa, lalo na ta dai na makakatestigo si Fajarda huli sa saiyang kondisyon pangkagabsan.
