NAGA CITY- Piglatag na kan Public Safety Office- Naga an saindang mga preparasyon katakod sa pag-obserbar kan Holy Week ngunyan na taon.
Katakod kaini, pigsuspender paramientras an anuman na leave application kan mga personahe kan nasambitan ng opisina.
Ini an tanganing masierto na kumpleto sinda sa mangyayaring deployment sa pag obserbar kan Semana Santa sa siyudad nin Naga.
An nasambitan ng deriktiba an basado naman sa pigpaluwas na pahayag ni Renne Gumba, Executive Director kan nasambitan ng opisina komo kapreparaduhan sa mga magigin aktibidad. Paliwanag ni Gumba, kaipuhan na masierto an seguridad kan publiko mantang ginigibo an anuman na mga aktibidad asin katakod sa Holy Week.
Huli digde, kaipuhan na an mga personahes kan Public Safety Office- Naga orog na an nasa traffic management center an mahihiling sa upper barangay, sa mga resorts asin sa iba pang mga pampublikong lugar.
Mientrastanto, bako sana soboot mga PSO personnel an mahihiling kundi magin an iba pang nasa law enforcement agencies asin volunteer groups.
Pirang aldaw man antes an Holy Week, liwat na pigpapagirumduman an lambang saro na magsunod sa piglatag na mga panundunan tanganing malikayan an anuman na kariribukan o insidente sa pag-obserbar kan nasambitan ng aktibidad.
Sa ngunyan, hagad na sana kan opisyal an kooperasyon kan gabos para sa matuninong na obserbasyon kan Holy Week.
