Aram baya nindo mga ka-Bombo, sarong lalaking palaboy sa Brazil an nagkaigwa nin pagkakataong baguhon an saiyang buhay makalihis mag-viral an sarong video kaini na nagbabali sa sarong 8-kilometer fun run mantang naka-tsinelas sana.
Sigun sa mga report, nag desisyon si Isaque dos Santos Pinho, 31 anyos, na magbali sa sarong fun run sa saiyang banwaan sa Garrafão do Norte kan nakalihis na Hulyo 27.
An saiyang rason, nakainom ini kan banggi antes an saiyang nagin event asin naisip kaini an pagdalagan an makakatabang na maibsan an saiyang hangover.
Dawa na dae ini rehistrado asin man naka-tsinelas sana, sumabay man giraray ini sa mga partisipantes. An saiyang paghingyha an nakuanan nin sarong drone camera asin marikas na naglakop sa social media.
Bagaman dae kaini namantinir an rikas sa bilog na 8 kilometer run, tinapos pa man kaini an karera asin nakaresiber pa nin medalya. An saiyang storya an marikas na nagin national headline sa Brazil.
Si Isaque, na nagdakula na pobre asin man nagin biktima kan alcoholism, an nagdesisyon na gamiton an atensiyon tangani na magbago.
Makalihis man na mag-viral an saiyang video, nagpuon na ining makaresiber nin mga donasyon siring na sana kan sapatos, bado, asin magin imbitasyon na magsanay kaiba an mga propesyonal na runner.
