NAGA CITY- Paramientras na dae nakakaagi an mga railroad trolley o skates makalihis an nairehistrong landslide sa riles kan Philippine National Railways (PNR) sa parte kan Del Gallego, Camarines Sur katakod kan namamatean na pag-uuran sa probinsya.
Ini an kinumpirmar ni Elberto Adulta, head kan Municipal Disaster Risk Reduction and Management Office (MDRRMO) Del Gallego sa pakikipag-olay kan Bombo Radyo Naga.
Sigon ki Adulta, paramientras na dae nakakaagi an mga railroad trolley sa riles na nagkokonektar sa barangay Sinuknipan asin kasentrohan kan nasambitang banwaan makalihis an nangyaring pagrasay nin daga sa parte kan barangay Comadaycaday asin barangay Peñafrancia.
Sa national highway muna nag-a-agi an mga residente hale sa mga apektadong barangay para malikayan an anuman na posibleng problema na hatod kan nasambitang pangyayari.
Sigon ki Adulta, naipaabot na ninda sa manhamiento kan PNR an pangyayari asin an nasambitang ahensya suboot an igwa nin hurisdiksyon sa pagpapakarhay kan naraot na parte kan riles sa saindang banwaan.
Sa ngonyan, pigpapadoble ingat kan MDRRMO an mga residente sa lugar para makalikay sa anuman na problema.
