Pigbandera kan Metro Manila Disaster Risk Reduction and Management Council (MMDRRMC) an Red Alert status katakod kan seguridad para sa papaabotong Traslacion.
Epektibo an alert status puon kasuudma alas-8 nin pagkaaga hasta alas-8 nin pagkaaga sa Enero 10, 2026.
Sigun sa MMDRRMC memorandum, mahigot na pigtutukan kan Office of Civil Defense – National Capital Region (OCD-NCR) an gabos kan aktibidad puon ngunyan hasta sa aktwal na prusisyon kan Poong Jesus Nazareno.
Activated man an mga response clusters, kaibahan an Department of Social Welfare and Development (DSWD), National Capital Region Police Office (NCRPO), Department of Health (DOH), OCD-NCR, Metropolitan Manila Development Authority (MMDA), NCR Command (NCR COM), Department of Information and Communications Technology (DICT), Philippine Information Agency (PIA), asin Department of the Interior and Local Government – NCR (DILG-NCR).
Activated man an Regional Inter-Agency Coordinating Cell asin an gabos kan Local Disaster Risk Reduction and Management Offices (Local DRRMO) asin mga Local Government Unit (LGU) sa Manila.
Obheto kan pagbandera kan alert status na papusogon an inter-agency coordination asin masierto na may mga stand-by response teams, emergency resources asin malinaw na protocols para sa marekas na pagtugon mantang pigsasagibo an relihiyosong aktibidad.
