DAE na mapupugulan pa an pagkundusir kan Private Schools Athletic Association (PRISAA) 2026 sa Bicol Region.
Sa entrevista kan Bombo Radyo Naga ki Edwin A. Datan Jr., LPT, Designated Spokesperson kan Mabini Colleges Inc., sinaysay kaini na an saindang kolehiyo an magigin host sa dakulang event na ini nin karawat.
Mapoon an PRISAA sa maabot na Marso 18 asin matatapos man sa Marso 21 alagad maandam na soboot an saindang pamayuhan na maabot an mga delegado hali sa ibang mga unibersidad sa Bicol nin amay.
Sa kabilugan, igwa nin nilalaoman na more or less 2,500 na mga delegado sa bilog na rehiyong bicol an makikisumaro sa nasambitan ng karawat. Sigun ki Datan Jr. dae na mapupugulan pa an aktibidad na ini nin huli ta preparadong-preparado na an lambang atleta asin an mismong Mabini College dawa na may nangyaring duwang insidente nin bomb threat kan mga nakalihis na aldaw.
Dugang pa kan opisyal, magkakaigwa nin police visibility sa mismong aldaw nin PRISAA sa mga venue kan karawat asin sa bilog na eskwelahan tanganing mamantinir an seguridad, salbado an mga atleta asin coaches, asin tanganing dae na mautro pa an siring na insidente nin bomb threat.
Sigun pa sa opisyal, on going an mga preparasyon kan Mabini College orog na sa lado kan mga billeting areas, mga venue kan manlain-lain na sports asin an mismong concentration kan mga atleta.
Sa ngunyan pig-enkaminar na sana ni Datan Jr. an mga atleta, mga coaches, na padagos na magpreparar asin dae na mahandal pa sa mga dae nilalaoman na pagkakataon tanganing makapagpokus sa kawat.
