Nagsentro sa mainit na debate manungod sa voting threshold an ika-29ng aldaw kan Senate impeachment trial kontra ki Bise Presidente Sara Duterte ngunyan na Miyerkules, Setyembre 23.
Nag-atubang sa oral arguments sinda Representative Chel Diokno para sa prosecution panel kan Kamara asin si Attorney Mike Poa bilang representante kan defense team kan Bise Presidente.
Rinibayan ni Diokno si House Prosecutor Leila de Lima na dai nakapresentar huli sa sarong urgent concern, alagad dai na ipinahayag an detalye kaini apwera sa paghatod ni Presiding Officer Francis “Chiz” Escudero kan mensaheng “I wish her well.”
Ipinaglaban kan magkabilang lado an saindang legal na posisyon kun an kaipuhanan na dos-tersyo (2/3) na boto para sa hatol ibabase sa kabilugan na 24 na miyembro kan Senado o sa mga kwalipikadong senador-judges sana na aktibong nakikilahok sa paglilitis.
Nilalaoman na magdedesisyon asin magdedeliberasyon an mga senador-judges sa pamamayo ni Escudero tanganing opisyal na botohan an gagamiton na alituntunin sa hatol.
