Gadan an Russian Lieutenant General na kinilala na si Fanil Sarvarov makalihis sumabog an sarong bomba na nakabugtak sa ilalim kan saiyang lunadan sa Moscow, ayon sa Russia’s Investigative Committee.
Si Sarvarov, 56 anyos, an lider man operational training department kan armed forces. Teorya kan mga awtoridad basado sa saindang imbestigasyon may kinaraman an pakikiaram kan Ukrainian intelligence, alagad mayo pang opisyal na pahayag gikan sa Ukraine.
Mabihiling sa mga ladawan gikan sa lugar an sarong puting lunadan na naraot an mga pinto, sa laog kan sarong parking lot harani sa apartment block sa lugar.
Sa saindang nasyon pigsunad na kan mga awtoridad an kasong murder asin illegal trafficking kan mga pampasabog. Bistado si Sarvarov sa saiyang combat operations kan Ossetian-Ingush conflict asin Chechen wars kan 1990s asin early 2000s. Saro man ini sa mga namayo sa operasyon sa Syria kan 2015-2016.
Ipinaaram man tulos ki Russian President Vladimir Putin an pagkagadan ni Sarvarov, sigun sa Kremlin. Napagaraman na magpuon kan puonan kan Russia an full-scale invasion sa Ukraine kan Pebrero 2022, nagkapirang opisyal na kan militar an nagin target kan car bomb sa Moscow
