Nagsunad nin “not guilty” plea si Sarah Discaya kaibahan an siyam pang akusado kan soboot ghost flood control project na nagkakantidad nin Php 96.5 milyon sa Davao Region.
Ginibo ninda ini sa arraignment na pigsagibo para sa duwang kaso kan pagbalgar sa Anti-Graft and Corrupt Practices Act asin malversation of Public funds kasuudma sa RTC branch 27 sa Lapu-lapu City.
Kaibahan ni Discaya nagsunad nin “not guilty” plea sinda Ma. Roma Angelin Rimando, na kinakatawan an St. Timothy Construction asin an walong indibidwal na gikan sa DPWH Davao Region.
Sinda an nahahampang sa mga alegasyon kan pagbalgar sa ley huli sa saindang papel sa nasambitan na proyekto.
An sampulong akusado pigdara gikan sa Lapu-Lapu City Jail pasiring sa courtroom ni Judge Nelson Leyco para sa pormal na arraignment.
Sa pagdangog, pigsayumahan kan korte an kahagadan kan mga akusado na ibasura an mga kaso kontra sa sainda asin ibwelta sinda sa kustodiya kan National Bureau of Investigation (NBI).
Dae pinagbigyan kan korte an saindang mosyon na dismiss an kaso.
An pre-trial conference man nakatalaan sa Pebrero 3, 2026, kun saen pag-uurulayan an mga isyu asin ebidensya antes an pormal na paglilitis.
