NAGA CITY – Pig-eksplikar kan mga otoridad an nagin rason kan pagkagadan kan sarong kagawad na nadukayang mayo na nin buhay sa Agrupacion, Ragay, Camarines Sur.
Binisto an biktima na si alyas Francisco, barangay kagawad sa Bangon, Lupi, Camarines.
Sa entrevista kan Bombo Radyo Naga ki PMaj. Ryan Bagasala, officer-in-charge kan Ragay Municipal Police Station, sinaysay kaini na basado sa pahayag kan backrider asin kaibahan kan biktima kan mangyari an insidente na si alyas Jeric, na pauli na sinda gikan sa Colacling makalihis na magdalan nin basketball kan makamati nin pagsikip kan saiyang hinangos an biktima.
Huli digdi, mapasiring pa kuta sinda sa ospital para sa magkakanigong asistensya medikal alagad posible soboot na mas naglain pa an pagmati kaini rason tanganing mawaran ini nin kontrol sa pigmamanehong motorsiklo asin matumba sa gilid kan tinampo.
Huli sa pangyayari magin an backrider na si Jeric an napaturog man, alagad kan magimata soboot ini bandang alas-2 nin mag-oomagahon tolos man kaining pighanap si Francisco alagad dae ini nahiling.
Dugang pa ni Bagasala, posibleng dae kaini nahiling an biktima huli sa madiklom na kapalibutan asin nakaapon pa ini sa maawot na parte kan tinampo.
Makalihis ini, naglakaw-lakaw pa si Jeric hasta makahiling nin tricycle asin duman liwat na nagturog hasta alas-9 nin aga.
Sa kasamaang palad man digdi naman binawian nin buhay an biktima huli sa soboot pagkakatama kan liog kaini, basado naman sa resulta kan otopsiya.
Sa ibong na lado, apwera digdi mayo naman nin iba pang indikasyon na nagkaigwa nin foul play sa nasambitan ng insidente.
