NAGA CITY- Nakikipagtabangan na ngonyan an Municipal Disaster Risk Reduction and Management Office (MDRRMO) sa Philippine National Railways (PNR) para sa clearing operation sa sarong porsyon nin riles sa Barangay Apale, Ragay, Camarines Sur na natahuban nin narumpag na daga.
Ini igwa koneksyon pa nanggad sa pag-uuran na namamatean sa probinsya na nagpuon pa kan nakaaging mga aldaw huli sa Bagyong Urduja.
Sa entrevista kan Bombo Radyo Naga ki Neopito Tipay Jr., head kan MDRRMO-Ragay, sinaysay kaini na landslides prone area an nasambitang lugar kun kaya kadakol an nairerehistrong pagtupag nin daga sa nasambitang lugar.
Huli sa mga debris na nakabagat sa nasambitang riles nin tren, dae suboot ini maagihan kan mga residente asin kan nagbabyaheng mga troley sa lugar.
Sa ibong kaini, pigsierto man ni Tipay na mayong nairehistrong casualty sa saindang lugar katakod kan nasambitang insidente.
Sa ngonyan, hinahalat na sana suboot ninda an magiging lakdang kan manhamiento kan PNR katakod kan nasambitang problema.
