Aram baya nindo mga ka-Bombo, sarong Vietnamese restaurant an nag viral kan maglansar ini nin sarong bagong putahe na bubble tea beef noodles.
An nasambitan na Vietnamese restaurant an nakabase sa Hanoi, an bagong putahe soboot na pinagsasaro an milk tea, tapioca pearls, mahibog na noodles asin mga hiwa nin lutong karneng baka na pigdudumog kan mga tawo.
Sigun ki Yu Tang, may-sadiri kan nasambitan na restaurant, an putahe igwa man soboot nin pinaghalo na sabaw nin gulay, itom na tsa asin preskong gatas na pigsisirbe kaiba an noodles, tapioca pearls asin corned beef.
Pigsaysay pa man kaini na pambihira soboot an namit, kaya man an nagkapirang mga Vietnamese costumer nasasakitan na iladawan ini.
Igwa nin nagsasaysay na kaparehas soboot kan milk tea alagad mayo kan karakteristikong kahamisan kan inomon, mantang an iba nagsasabi man na an texture kan tapioca dai man talaga angay sa putahe.
An nasambitan na Vietnamese restaurant an naglansar kan saindang bagong bubble tea beef noodles kan nakalihis na Setyembre 29, na pig-anunsyar ini komo sarong pambihirang kombinasyon na maeksperyensiyahan sana sa saindang lokasyon sa Hanoi.
Sa ngunyan, an nakakaintriga na kombinasyon kan bagong putahe, siring man an marketing campaign kaini padagos na nagigin sentro kan urulay sa social media sa Vietnam.
