Dagos nang ibinasura kan Korte Suprema an petisyon na nagku-kwestyon sa isinagibong proseso kan House of Representatives Committee on Justice sa ‘impeachment complaints’ kontra ki Vice President Sara Duterte.
Segun sa SC na an mga isyu na ipigradi sa petisyon an naging ‘moot’ o maikokunsidrar na dae na nangangaipo nin resolusyon.
Paliwanag kaini na inaprubaran na kan Kamara an Articles of Impeachment asin dagos na nai-transmir sa Senado na ngunyan na nagseserbi bilang ‘Impeachment Court’.
Sa resolusyon na ipinaluwas kan Korte Suprema, ibinasura kaini an magkasuway na petisyon ninda Atty. Israelito Torreon asin Vice President
Duterte kun sain kinuwestyon an naging findings kan komite sa mga reklamo.
Ipinaliwanag kan hukuman na an transmittal kan Articles of Impeachment an hudyat na nagtapos na an ‘impeachment process’ sa parte kan House of Representatives.
Huli digdi, an anuman na desisyon pa kan Supreme Court sa validity kan mga aksyon sa ginibo kan Kamara an dae na makaka apektar sa kontrobersiya.
