NAGA CITY- Prangkang sinaysay ni House Majority Floor Leader Rolando ‘Nonoy’ Andaya Jr. na ginagamit ni Budget Sec. Benjamin Diokno an saiyang posisyon para paburan sana an
nagkakapirang kontraktor sa mga proyekto partikular na sa probinsya nin Sorsogon. Sa entrevista kan Bombo Radyo Naga, sinaysay ni Andaya na kan taong 2017, nairehistro an 7,800%
increase o haros bilyon-bilyon an naibulsang proyekto kan kontraktor na CT Leoncio na ginamit sa nagkapirang mga ‘dummy accounts’ na kadaklan sa nasambitang probinsya.
Kinakaipuhan man suboot na magtao nin 15% na komisyon an kontraktor sa nagkapirang mga pulitiko sa Sorsogon urog na an mga kaparyentes ni Sec. Diokno. Huli digdi, bilog an
pagtubod kan Majority Leader na ginagamit ni Diokno an saiyang posisyon komo sekretaryo kan Department of Budget and Management (DBM) para maimpluwensyahan an
Department of Public Works and Highways (DPWH) na paburan an nagkapirang kontraktor. Kumpyansa man si Andaya na mas maipapaliwanag ninda an mga maanomalyang
proyekto sa gigibuhong mga public hearing sa isyu sa tabang naman kan saindang mga kapot na ebidensya asin mga dokomento.
