NAGA CITY- Pigsierto kan Philippine Army na igwa sindang pigtataong seguridad sa mga nagsusukong miembro kan rebeldeng New People’s Army (NPA.)
Segun ki Col. Paul Regencia, spokesperson kan 9th Infantry Division, Philippine Army, igwa nin mga nakalatag na plano an saindang linyada tangani na masierto an seguridad kan mga masukong NPA asin tangani na dae sinda mabalusan kan saindang dating mga pag-iriba.
Klinaro man kan opisyal na apwera sa Philippine Army, pwede man magsuko an mga rebelde sa mga padi, kagawad kan media, mga paratukdo, barangay officials asin sa mga kapulisan.
Makikipagtabangan na sana suboot an nasambitang mga sektor sa militar para sa pagproseso kan Comprehensive Local Integration Program (CLIP) na para sa mga nagsusukong rebelde.
Tinawan duon ni Regencia na dapat dae matakot an mga rebelde na magsuko asin magbalik loob sa gobyerno huli ta tatabangan man suboot an mga ini na makapagbagong buhay.
An pahayag na ini kan opisyal katakod kan nagsukong rebelde sa PNP hale sa Garchitorena, Camarines Sur.
