NAGA CITY- Nagin matuninong soboot an nagin selebrasyon kan kapaskuhan sa may parte kan banwaan nin Gainza, Camarines Sur.
Sa entrevista kan Bombo Radyo Naga ki PCPT Jeson Max F. Barcena, Chief of Police kan Gainza MPS, sinaysay kaini na mayo man nairehistrong darakulang insidente kasabay kan pagselebrar nin kapaskuhan apwera sa sarong insidente na naipa-abot sa saindang opisina kasuudma kun saen igwa soboot aki na naputukan nin boga.
Sigun pa ki Barcena, dae man talaga naputukan nin boga an menor de edad, basado kaya sa imbestigasyon kan saindang hepatura, nagkakawat an aki kan matalsikan nin acetone na nagin kawsa kan iritasyon sa saiyang mata.
Tolos man soboot pigdalagan an nasambitan ng menor de edad sa ospital para sa asistensiya medikal.
Kasabay kaini, liwat na pinagirumduman kan opisyal an saindang mga residentes na likayan an paggamit nin iligal na paputok siring kan boga nin huli ta mayo ining marhay na maitatao orog na sa pagsabat nin bagong taon.
Pigsierto man kan opisyal na padagos an saindang kampanya kontra sa paggamit nin paputok sa tabang kan mga barangay council tanganing magin salbado an pagselebrar kan New Year.
Sa ngunyan, pigsierto na sana kan opisyal na yaon 24 oras an saindang motorist assistance center tanganing magtao nin asistensiya sa mga nangangaipuhan.
