Nangapodan si Senador Sherwin Gatchalian sa mga local government units (LGUs) na pahiguton an mga lakdang sa fire prevention mantang nagdadangadang an tag-init, kun saen an panahon na ini an mas halangkaw an peligro kan kasulo.
An pangapodan kan senador an kasinod kan matinding kasulo na nagbungkaras sa Barangay Lamion sa Bongao, Tawi-Tawi kan nakalihis na Pebrero 3.
Sigun sa Municipal Disaster Risk Reduction and Management Office, marekas na naglalakop an kalayo huli sa mga madaling magliyab na materyales asin makukusog na duros sa suruksukan na komunidad sa baybayon.
Pigkakarkulong 1,404 pamilya an nawaran nin istaran huli sa insidente. Nag-abot sa P17.5 million an danyos sa pribadong pagsasadiri, mantang maabot man sa P18 milyon an danyos sa mga pampublikong imprastraktura.
Binanggit man ni Gatchalian na kadakol sa mga insidente kan kasulo an pwedeng malikayan, asin karaniwang rason an overloadad electrical circuits asin ilegal na koneksiyon kan kuryente.
Pig-eenkaminar kaini an mas mahigot na pagpapautob kontra sa mga unauthorized electrical hookups asin an tamang pagkapot asin pag-iimbak kan liquefied petroleum gas (LPG) tanganing malikayan an peligro kan kasulo.
Pig-enkaminar man kaini an mga LGU na pahiguton an information campaigns asin magsagibo nin community-based drills, orog na sa mga lugar na durukutan an mga harong.
