Napabareta na nangengenot nacontender para sa chairmanship kan Senate Blue Ribbon Committee si Senador Francis “Kiko” Pangilinan makalihis ipahayag ni Senate President Pro Tempore Panfilo “Ping” Lacson an saiyang desisyon na bumaba sa puwesto mantang nagpapadagos an imbestigasyon kan panel sa multibillion-peso flood control fund scam.
Seryosong pinag-iisipan an urulay kan masalida ki Lacson huli man sa imbestigasyon kan mga maanomalyang flood control projects na kinaiimbweltuhan kan mga lehislador na napabareta na nakinabang sa mga proyektong pang-imprastraktura kan gobyerno.
An Blue Ribbon Committee, na nag-iimbestigar sa katiwalian kan gobyerno asin salang paggamit kan pampublikong pondo, nagkaigwa na nin duwang tagapangulo magpuon an 20th Congress kan nakalihis na bulan nin Hulyo.
Kinua ni Lacson an puwesto makalihis na magin Senate President si Senador Vicente Sotto III, karibay ni Senator Rodante Marcoleta.
Inanunsyar ni Lacson kan nakalihis na aldaw, (Oktubre 5) na mababa ini sa makapangyarihang puwesto makalihis maaraman na nagkapira sa saiyang mga kaibahan an dae naoogma sa saiyang pagkapot sa imbestigasyon sa flood control.
Sigun sa opisyal, gabos na mga chairpersons kan Senate committees an pig ilihir kan mga pag iriba, nagsiribi soboot ini sa onra kan kagabsan partikularmente an miyembro kan mayorya .
Nagtutubod pa ini na kun an nagkapira sa grupo an nagpahayag kan saindang pagkasdimaya sa saiyang pamamayo, tamang oras na tangani mag atras pabor sa ibang miyembro na para sainda kayang pamayuhan an komite nin mas maray.
