Maduon na pigpahimutikan ni Senate President pro-tempore Ping Lacson na nag-eespiya ini sa opisina ni Senator Rodante Marcoleta.
Nagpalag kaya si Marcoleta sa ginibong pagpapakua ni Lacson kan CCTV footages kan September 25 kun saen naglaog sa opisina ni Marcoleta si dating Marine Technical Sergeant Orly Regala Guteza asin naghaloy duman nin nasa 30 minuto.
Si Guteza man na makalihis ibuyagyag na dati ining aide ni dating Congressman Elizaldy Co asin naghahatod nin male-maletang kwarta sa dating amo asin ki former Speaker Martin Romualdez an dae pa matunton sa ngunyan kan Blue Ribbon Committee.
Pigpayuhan ni Lacson si Marcoleta na magkulog an boot huli ta pampublikong lugar an Senado asin sinda an mga public officials kun kaya laoman na maski an mga nagbibisita sa sainda an maihahapot.
Iaagi na sana ni Lacson ki Marcoleta o kaya ki dating Congressman Mike Defensor an subpoena ki Guteza huli ta an mga ini an nagpahampang sa testigo asin kun enkaso man na dae mag-abot sa masunod na pagdangog dae man kaini ipapaarestrar si Guteza huli ta pigpapa-imbestigaran na ini kan korte sa Manila huli sa pamemeke kan pirma sa notaryo kan sinumpaang salaysay.
