Pigpayuhan ni Senate President Tito Sotto III si Senator Robinhood Padilla sa pagluluwas kaini nin audio clip na pinadara sana sa saiya sa tahaw kan pag-urulay kan 2026 budget kan Presidential Communications Office (PCO).
Sa tahaw kan budget deliberation pigkwestyon ni Padilla an PCO kun nagpapadalagan ba sinda kan troll farm asin kasabay kaini pinadangog an sarong audio clip kan duwang babaeng nag-uulay dapit sa paghagad nin budget para sa mga blogger alagad palpak man an trabaho.
Pighapot ni Padilla an PCO kun igwa sindang aram dapit digde asin basado sa nakuang impormasyon, boses ini ni PCO Usec. Claire Castro na kaulay an sarong babae na iyong nagkakapot sa mga blogger.
Alagad, pinayuhan ni Sotto si Padilla na imbes na magbanggit kan pangaran na dae man sigurado, isumiter na sana an audio clip sa NBI tanganing maisairarom sa voiceprint tanganing masierto kun tunay o gibo lang kan AI an boses.
Magigin unfair o dae patas soboot ki Atty. Castro kun i-a-assume na ini talaga an boses mantang dae pa man ini napapatotoohan.
Mientrastanto, pigsayumahan man ni Senator Loren Legarda na iyong nagdepensad sa PCO budget, na mayong pigmamantinir na troll farm operations an Marcos administration.
