Naglalaom an Senate Impeachment Court na tulos na maresolbar kan Korte Suprema (SC) an mga petisyon na nagkukuwestiyon sa desisyon kaini na ribayan an basehan sa bilang kan mga boto para ma-convict o ma-acquit si Bise Presidente Sara Duterte.
Segun ki Impeachment Court Spokesperson Atty. Reginald Tongol, inaasahan ni Presiding Officer Senator-judge Francis “Chiz” Escudero asin kan bilog na impeachment court na makapagluwas an SC nin desisyon bago magboto an mga senator-judge sa pinal na hatol sa impeachment case.
Importante suboot na maresolbar muna an isyu antes an pinal na pagboto tanganing malikayan an sitwasyon na nakapagluwas na nin desisyon an impeachment court alagad nakabinbin pa man giraray sa SC an usapin manungod sa validity kan voting threshold.
Marurumduman na sa naging ruling kan Impeachment Court kan Setyembre 23, 13-0 kaini na pinagtibay na an two-thirds requirement ibabatay sa mga senador na legal asin aktuwal na makakabali sa paglilitis.
Huli kaini, nagribay an dating 16-vote threshold, depende sa bilang kan mga senator-judge na kwalipikadong makabali sa oras kan pinal na hatol.
Sa ibong kaini, duwang magkasuhay na petisyon na an isinangat sa Korte Suprema laban sa nasabing ruling.Si dating Executive Secretary Victor Rodriguez an enot na nagsangat nin Petition for Certiorari and Prohibition kan Setyembre 24 asin naghagad man nin temporary restraining order laban sa pagpautob kan bagong voting rule.
Mantang nagsangat man si Atty. Ernesto Francisco Jr. nin suhay na petisyon kan Setyembre 25, kun sain hinagad niya na ideklarang unconstitutional an ruling kan impeachment court asin magluwas an SC nin Status Quo Ante Order tanganing papunduhon an implementasyon kaini.Sa ngunyan, sinabi kan impeachment court na magpapadagos an paglilitis mantang mayo nin kautusan hale sa Kataas-taasang Hukuman na nagmamando na papunduhon ini.
