Nagpatanid an legal expert na posibleng mahampang sa kaso si Senator Robinhood Padilla katakod kan pagtabang kaining makaluwas ni Senator Ronald “Bato” dela Rosa sa Senado kasabay kan operasyon kan NBI tanganing ipautob an ICC arrest warrant.
Base sa report, preparado si Padilla na mag-atubang sa imbestigasyon alagad tinawan doon kan senador na mayo ining ginibong ilegal sa insidente. Sinunod sana suboot ninda an ipinapautob na patakaran kan Senado manungod sa koordinasyon asin pangangaipo nin court order antes magsagib nin ano man na pag-aresto.
Magigirumduman nagkaigwa nin tensyon sa insidente matapos purbaran kan NBI na ipautob an ICC warrant laban ki Dela Rosa, na nasa irarom kan Senate protective custody.
Huli digdi, nagluwas an isyu kun nagkaigwa nin obstruction of justice asin kun siisay an dapat na managot. Sa irarom kan Presidential Decree 1829, posibleng makasuhan an siisay man na magtabang o magkukop sa sarong indibidwal tanganing makalikay sa pag-aresto.
Alagad baranga an opinyon kan mga legal expert kun sakop kaini an ICC warrant o limitado sana ini sa mga domestic criminal cases.May mga nagsasabi man na posibleng magkaigwa nin pananagutan sa iba pang opisyal kan Senado depende sa magiging desisyon kan korte asin sa interpretasyon kan mga otoridad sa nangyaring insidente.
