Nagadan an senior Islamic State (IS) group leader na si Abdallah Makki Muslih al-Rifa, o mas bistado sa apod na Abu Khadija sa airstrike sa Iraq na piglunsar kan US Central Command forces (CENTCOM) sa pakikipagtabangan kan Iraqi Intelligence and Security Forces.
Isinagibo an precision airstrike kan nakalihis na Marso 13, alagad kasuodma aldaw nin Sabado, Marso 14, isinapubliko kan US Central Command an video footage kan saindang operasyon na nanggadan sa ISIS leader.
Sa sarong statement, sinaysa kan US Central Command na makalihis an strike pigdumanan kan CENTCOM asin Iraqi forces an strike site asin duman nahiling an representante kan ISIS terrorists.
Apwera sa ISIS leader kaibahang binawian nin buhay sa airstrike an saro pang ISIS operative.
Kapwa nakasulot an mga ini nin unexploded suicide vests asin igwang mga manlaen-laen na armas.
Naaraman man an pagkakakilanlan kan ISIS leader sa paagi kan DNA match gikan sa nakolektang DNA sa nakalihis na raid kun saen ini nakatakas.
Sigun ki US Central Command Commander Gen. Michael Erik Kurilla, si Abu Khadijah an saro sa pinaka-importanteng miyembro kan ISIS sa bilog na global ISIS oranizqation.
Nagpatanid man ini na ipapadagos ninda an paggadan asin paglansag sa mga terrorist organization na huma sa saindang nasasakopan asin mga kaalyado asin partner personnel kan Amerika sa rehiyon asin iba pa.
Pigkokonsiderar man kan command si Abu Khadijah komo Global ISIS #2 leader asin Chief of Global operations and Delegated Committee Emir.
Komo Emir kan ISIS, ini an responsable sa mga operasyon, logistics, asin pagpaplano kan ISIS sa bilog na kinaban asin nagsusugo sa pagpopondo para sa global organization kan ISIS.
Sigun man ki Iraqi Prime Minister Mohammed Shia al-Sudani, pigkokonsiderar si Abu Khadija na saro sa pinaka-peligrosong terorista sa Iraq asin sa bilog na kinaban.
Sinaysay man ni US President Donald Trump na an Islamic State leader an mayong patid na pigtugis kan intrepid warfighters.
