Emosyonal na naghampang kasuodma, Marso 31, sa sarong press conference si South Korean actor Kim Soo-hyun makalihis an mga alegasyon soboot na nagkaigwa nin relasyon sa nagtalikod na sa kinaban na South Korean aktres na si Kim Sae-ron kan ini an menor de edad pa sana.
Alagad tahasan ining pinahimutikan ni Kim Soo-hyun, na soboot dae ini nakipag-date ki Kim Sae-ron asin pigtawan-duon ni Kim na sala an alegasyon na ini.
An kontrobersya an nagkuriyat sa social media pirang semana na an nakalihis, na nagresulta sa pagkawara kan pirang brand endorsements kan aktor.
Dugang pa ni Kim Soo-Hyun na haloy na kaining piglilikayan an pagluwas kan mga bareta tanganing magtaram huli sa takot ini sa mga posibleng magin epekto kan saiyang career.
Aminado pa an aktor na nakipag-date ini ki Kim Sae-ron, alagad piglinaw kaining nangyari sana ini kan magin legal an edad kan aktres na si Kim Sae-ron.
Dugang pa ni Kim, na kaya kaini piglilikayan na akuon ini kaidto huli sa posibleng magin epekto kaini sa saiyang ongoing na drama na Queen of Tears.
Pig-iisip man kaining igwang mga tawo asin proyektong maapektaran kan saiyang desisyon kaya nagduwang-isip ining magtaram.
Maduon man na pinahimutikan ni Kim na igwa ining kinaaraman sa pagkagadan kan yumaong aktres.
Sigun sa aktor, mayo ining kinaaraman sa nangyaring trahedya ki Kim Sae-ron asin mayo soboot kinaaraman an saiyang agency sa anuman na pressure katakod sa mga utang kan aktres.
Makalihis an press conference, dae na liwat nag-ako nin entrevista si Kim Soo-hyun asin tulos na naghali sa stage.
Mientrastanto an saiyang abogado an nagsabi na nagsasagibo na sinda nin mga legal na lakdang kontra sa pamilya kan yumaong aktres asin an Youtube channel an nagpakuriyat nin mga salang alegasyon.
