NAGA CITY- Gadan an sarong soltero makalihis na masaksak sa tahaw nin iwal kan duwang grupo sa ciudad nin Naga.
Binisto an nagadan na si Reymart Palma, 20-anyos.
Sa nakuang impormasyon kan Bombo Radyo Naga, napag-araman na naglalakaw suboot an biktima kaibanan an saiyang limang mga amigo kan makasabatan kan mga ini an duwang mga suspek na sinda Larry Mar Lana, 19-anyos asin Rommel Tolero, 19-anyos.
Napuli suboot sa pambabanog an dae pagkakasinabutan sa pag-ultanan kan mga ini asin digdi na sinaksak si Palma kan duwang mga suspek.
Tulos man na pigdalagan sa ospital an biktima alagad pigdeklarar na ining dead on arrival kan mga doktor.
Nakumpiskar man kan mga otoridad sa duwang suspek an sarong kutsilyo asin icepick na pigtutubudang an mga patarom na ginamit sa krimen.
Sa ngonyan, nagtitinir na sa kostudiya kan mga otoridad an nasambitang mga suspek mantang inaandam na an kasong isasangat laban sa mga ini.
