Nagpuon na an mga awtoridad sa South Africa kan manhunt operation makalihis an sarong malagim na insidente kan pambabadil sa sarong tavern sa Bekkersdal, sarong township na mahihiling sa gold-mining area harani sa Johannesburg, na nagwalat nin siyam (9) na katao an gadan asin sampulong (10) lugadan.
Sigun sa pulisya, pigkakarkulong 12 an dae pa nabibistong mga gunmen an nag abot gamit an duwang lunadan, dara an pistols asin AK-47. Digde mayong habas na pinagbabadil an mga tao sa laog kan tavern kan nakalihis na aldaw.
Pitong lalaki asin duwang babae an kabali sa mga nagadan.
Sinaysay kan mga awtoridad na may lisensya an tavern, alagad mayo pang malinaw na motibo sa nasambitan ng pambabadil.
Sigun ki Maj-Gen Fred Kekana, deputy provincial police commissioner kan South Africa, duwa sa mga biktima an binadil sa luwas kan tavern mantang tumatakas, asin man an pantulo an sarong taxi driver na naghatod sana nin pasahero harani sa lugar.
Sa presente, padagos na nagsasagibo nin imbestigasyon asin paghahanap an mga pulis tangani matukoy an mga suspek asin an rason kan pambabadil.
An South Africa an bistado sa pagkakaigwa nin saro sa pinakahalangkaw na murder rates sa bilog na kinaban.
Sigun sa mga report, may average na 63 na katao an ginagadan kada aldaw magpuon Abril hasta Setyembre kan presenteng taon, sarong alarming na numero na padagos na nagpapahiling nin malalang isyu kan krimen sa nasyon.
