Pinangenotan ni House Speaker Martin Romualdez kaining Huwebes an sarong Christmas event kaiba an mga aking pasyente asin saindang pamilya asin sarong People’s Day sa Philippine Children’s Medical Center (PCMC) sa Quezon City.
Nag-ibahan sa “Paskong Tarabangan Event” sinda Speaker Romualdez, an agom kaining si Tingog Rep. Yedda Marie Romualdez, asin Ako Bicol Rep. Elizaldy Co.
An Ako Bicol partylist an host kan event.
Sinaysay ni Speaker na saro ini sa saiyang paboritong aktibidad komo sarong mambabatas na mapaogma an mga aking igwang helang.
Sigun pa digde na apwera sa pagpepreparar kan sarong selebrasyon para sa mga aki asin saiyang pamilya, iyo man an mag-abot nin tabang sa mga naka confine soboot sa PCMC asin magbisita sa children’s ward tanganing magtaong regalo asin ipamate soboot an pasko sa PCMC.
Nagpakol sa 130 mga kaakian an nakiogma sa Christmas Party na sinundan kan People’s Day kan Ako Bicol Party List kun saen nagtao nin guarantee letter tanganing matabangan sa pagpapabulong an mga pasyente.
Binisita man kan mga mambabatas an mga aking pasyente sa mga ward asin pigtawan nin regalo an mga ini.
Apwera sa mga regalo, sinaysay ni Speaker Romualdez na an mga pasyenteng pig-imbitaran sa event an makikinabang sa zero billing na ikinaogma kan mga nasa ward asin mga magurang.
Sinaysay ni Rep. Yedda na mayong mapagbugtakan an saiyang kaogmahan kan mahiling an ngirit kan mga kaakian.
Pighiling man kan mga mambabatas an pigpapatindog na Philippine Cancer Center sa laog kan Blood Bank Complex, siring man an Mega Hemodialysis Legacy Building kan National Kidney and Transplant Institute, na parehong yaon sa Quezon City.
Pigbusol kan Kamara de Representantes na mapondohan an pagpapatindog kan mga nasambitan ng pasilidad.
