Inaasahang mapadagos si State Auditor Xylene Del Campo sa Audit Trail ng Office of the Vice President (OVP) asin Department of Education (DepEd) katakod kan paggamit nin P612.5 milyong confidential funds.
Segun kay House Prosecution Spokesperson Atty. Benjamin “Jay” Tolosa Jr., sisimbagon ni Del Campo an mga hapot manungod sa mga masurunod na lakdang sa audit, kabali an notice of disallowance.
Nainot nang nagtestigo si dating state auditor Roderick Wamil manungod sa mga audit stage asin dokumentong personal niyang tigkakapotan. Siring man, nilimitahan kaini an testimonya sa mga pangyayaring naganap bago siya naghali sa Commission on Audit (COA).
Segun kay Tolosa, dae pag-uulit nin testimonya ni Wamil an paghampang ni Del Campo huli ini an naghalili sa mga masunod na parti kan audit.
Inaasahang matao si Del Campo nin saridiring testimonya manungod sa mga nagin lakdang asin rekord kan COA sa pagpapadagos nin audit sa confidential funds.
