PIGTAWAN-DUON kan National Economic Development Authority (NEDA) na nag-agi sa masusing pag-aadal an pag-aprubar kan saindang board sa tariff cut sa bagas na 15%, gikan sa dating 35%.
Pigsambit ni Sec. Arsenio Balisacan na naiintindihan ninda an pangamba kan publiko, alagad pigsisierto man ninda na dai basta-basta pigsagibo an desisyong ini.
Antes soboot pig-aprubaran kan NEDA board an tariff recommendation kan Committee on Tariff and Related Matters (CTRM), nagsagibo an Tariff Commission nin mahewasang konsultasyon asin pagsusuri sa irarom kan Customs Modernization and Tariff Act (CMTA), na nagpuon kan Marso 2023 kun saen 801 nin stakeholders an pig-imbitaran asin 192 igdi an gikan sa agriculture sector.
Obheto kan NEDA Board sa tariff cut na masierto na may access an mga Pilipino sa masustansiya asin abot-kayang pagkakan, partikularmente na an bagas, mantang pig-gogobernaran an inflation asin pigmamantinir an economic growth momentum.
Basado sa pinakahuring inflation report kan Philippine Statistics Authority(PSA) sa nakaaging tolong bulan, nag-ambag an bagas nin haros 2 percentage points sa headline inflation.
Sa paagi soboot kan tariff cut, piglalaomang mapapababa kaini an presyo kan bagas mantang sinusuportaran an domestic production sa paagi nin tariff cover asin pagdugang sa budgetary support tanganing mapasakat an agricultural productivity kan mga paraoma.
