Piglalaomang mapapakarhay na ngunyan na aldaw, Nobyembre 30 an technical issue sa nagkapirang models kan Airbus aircraft na nagresulta sa kanselasyon asin pagpauktaba kan nagkapirang mga domestic flights sa Pilipinas, sigun sa Air Carriers Association of the Philippines (ACAP) kasuodma, Nobyembre 29.
Ini an makalihis mag-isyu an Airbus nin technical advisory para sa nagkapirang Airbus models kaini na A320/A31 tanganing magsairarom sa software update.
Pigreport ni ACAP executive director Jose Enriquez Perez de Tagle, 50 porsyento gikan sa mga apektadong aircraft an natapos nang mag-update kan saindang software.
Sarong aircraft man soboot an kaipuhan nin duwang oras tanganing matapos an pag-upgrade o pag-update kan software kaini.
Enot ng sinaysay ni Transportation Secretary Giovanni Lopez, na nasa 75 aircraft an naapektaran sa software update, na nagresulta sa pagkanselar kan 78 domestic flights asin pagkauktaba kan iba pang flights.
Sigun man sa ACAP executive director, 24 oras puon kasuodma, padikit-dikit nang maibe-bweltada an nakanselar na operasyon kan airlines.
Mientrastanto, sa oras man na makumpleto na an software update, kaipuhan kan mga airline na magsumiter nin compliance report katakod sa airworthiness kan eroplano tanganing matawan nin clearance na liwat makalupad.
