Paramientras na pigsarado kan Thailand an duwang border crossings kaini sa Cambodia kan Sabado komo lakdang sa saindang kasalbadohan kasunod kan nagtitinding tensyon sa pag-ulatanan kan duwang nasyon.
An desisyon an ginibo makalihis an nangyaring military clash kan Mayo 28 sa Emerald Triangle —sarong lugar sa pinagsasanib na agihan kan Thailand, Cambodia, asin Laos kun saen nagadan an sarong suldados kan Cambodian.
Sigun sa gobierno kan probinsya k an Chanthaburi, Thailand an mga tourist crossings sa duwang pangenot na border checkpoints an “temporarily suspended.”
Siringman, dagos pa man an kalakalan asin paglaog kan mga obrerong Cambodian.
Pighayag kan Royal Thai Army na an pagsasaradaro an tanganing proteheran an soberenya asin seguridad kan nasyon.
Apwera digdi, anom pang border points an nagpautob nin mahigot na oras kan operasyon asin pagbabawal sa darakulang behikulo. Sinaysay ni Thai Defense Minister Phumtham Wechayachai na nagkaigwa nin pagpapakusog kan puwersang militar sa lado kan Cambodia, na orog na nagpalangkaw kan tensyon.
Komo kasimbagan, nagdugang man nin tropa an Thailand sa saindang crossing border. Preparado man soboot an Thai army na magsibo nin “high-level operation” kun babalgaron kan Cambodia an saindang ley.
Sa ibong kan tensyon, itinalaan kan Thailand asin Cambodia ang bilateral talks sa Hunyo 14 tanganing maresolbaran an sigalot.
Sigun man ki Cambodian Prime Minister Hun Manet, bako sinda an mapuon kan kariribokan alagad preparado sindang ipagtanggol an saindang sadiring nasyon. Nagpatanid man an Cambodia na masumiter nin reklamo sa International Court of Justice (ICJ), maski pa dae pigbibisto kan Thailand an hurisdiksyon kaini.
Napag-araman na an tensyon haloy nang nag-iiral puon pa kan taong 2008, kan magkaigwa nin sagupaan katakod sa sarong sinaenot na templong Hindu na nag-abot man sa labi 28 katawo an binawian nin buhay sa mga nakalihis na taon.
