Aram baya nindo mga ka-bombo, an bagong pigpabisto na Tor Alva o White Tower na makukua sa sarong village sa Swiss Alps an pigmirar komo pinakahalangkaw na 3D-printed building sa bilog na kinaban.
Susog sa report, an Mulegns na bistado komo sadit na baryo na igwa sanang 12 na permanenteng residentes na makukua sa pamitisan kan Swiss Alps an sinasabi na bakong perpektong lugar para sa pag-install kan world’s tallest 3D-printed building.
Alagad sigun sa mga lokal na otoridad ini maikokonsederar na kakaibang lugar para sa installtion na makakatabang tanganing buhayon an an padikit-dikit nang nagagadan na komunidad.
An Tor Alva igwang langkaw na 30 meters asin igwa ining modular design na nagpapahiling sa 32 na indibidwal na naka-imprinta na konektado kan higanteng screws asin steel cables imbes na pulot para sa semento.
Mayong steel frame an ginamit sa pag-print kan tower alagad an creator kaini an nagsasabi na naggamit nin technological innovations tanganing magin salbado an nasambitan ng tower.
Ini an pigpabisto sa publiko kan nakalihis na May 20, 2025, sa hampang kan nasa 300 na tawo na excited na masakat an 3D-printed na hagdanan kan tower pasiring sa pinakatuktok kaini.
Sa ngunyan, tolos na nagsikat an lugar huli huli sa makapugol-hinangos na tanawin mantang nasa tuktok kaini.
