NAGA CITY- All set na an mga ilalatag na security measures kan law enforcement units kasabay kan tradisyunal na ‘Alay Lakad’ sa Camarines Sur na mapuon atyan na udto.
An Alay-lakad an taunang ginigibo sa probinsya kun saen pigkakarkulong maabot sa poko mas umenos 20 kilometro an lalakawon kan mga tao poon sa ciudad nin Naga pasiring sa banwaan nin Calabanga kun saan nakabugtak an imahe kan amang hunulid.
An Hinulid o sa tataramon na Filipino, ihinimlay, an imahe ni Hesus na bagong bulos makalihis na haleon sa pagkakapako sa Krus.
Sa entrevista kan Bombo Radyo Naga ki Calabanga Mayor Eduardo Severo, sinaysay kaini na igwang mga idedeploy na kabuhan kan Philippine National Police (PNP) asin mga barangay tanod para sa crowd control.
Magkakaigwa man nin ‘emergency lane’ para malikayan an nangyari kan nakaaging taon kun saen nasakitan na mag-agi an sarong ambulansya huli ta pano nin mga tao an bilog na tinampo.
Ipapasarado man suboot an nagkakapirang tinampo sa nasambitang banwaan urog na an pasiring sa Barangay Sta. Salud kun saen yaon digdi an kapilya ng Amang Hinulid.
Mientrastanto, nagtao naman suboot nin direktiba an alkalde sa mga barangay kapitan sa lugar na aagihan kan Alay-Lakad na higutan an pagpapabakal nin mga arak.
