Pigtuligsa ni U.S President Donald Trump an plano ni Elon Musk na magbilog nin bagong partidong pulitikal na pig-aapod kaining “America Party” na para sa Presidente sarong “ridiculous” o katawa-tawa asin matao sana soboot nin “confussion” sa lambang botante.
Sigun pa ki Trump, bastante na an duwang partidong nag-iiral sa Amerika asin dae soboot nagtatrayumpo an mga third party sa pagbilog kan mga siring na kamawotan.
Ginibo ni Trump an pahayag antes magsakay sa Air Force One pabweltada nin Washington.
An bagong partido ni Musk an kasimbagan sa bagong ley kan administrasyong Trump na ‘tax-cut asin spening bill’, na pigpirmahan kaidto ni Trump, na kalaunan pigkondenar ni Musk huli ta delikado soboot ini sa ekonomiya kan nasyon.
Marurumdumang nagpuon an hidwaan kan duwa makalihis mawara an green-energy credits para sa Tesla sa irarom kan bagong ley.Nagpatanid man si Trump na pwedeng bawion an mga kontrata asin subsidiya kan gobyerno sa Tesla asin SpaceX.
Dugang pa ni Trump, dae soboot nararapat na italaga si Jared Isaacman na kaalyado ni Musk, komo bagong pamayo kan NASA huli sa conflict of interest.
Mientrastanto, ipinagpauktaba kan Azoria Partners an paglulunsar kan saindang Tesla-focused investment fund huli sa bagong partido ni Musk, na pigkokonsiderar nindang sagabal sa saiyang tungkulin komo CEO kan kumpaniya.
