Hindi naituloy na mailathala ang isang ulat na nagsasaad ng bisa ng mga bakunang COVID-19 sa pangunahing scientific journal ng U.S. Centers for Disease Control and Prevention (CDC), ayon sa Department of Health and Human Services (HHS).
Ayon sa tagapagsalita ng HHS na si Andrew Nixon, dumaan sa iba’t ibang antas ng pagsusuri ang mga siyentipikong ulat bago mailathala upang matiyak ang mataas na pamantayan ng kalidad. Ngunit sa nasabing pag-aaral, nagkaroon umano ng mga alalahanin tungkol sa “methodological approach” o paraan ng pag-estima ng bisa ng bakuna kaya’t hindi ito tinanggap para sa publikasyon sa Morbidity and Mortality Weekly Report (MMWR) ng CDC.
Ang MMWR ay isa sa pangunahing publikasyon ng CDC na ginagamit sa paglalabas ng mga datos at gabay sa pampublikong kalusugan na malawak na sinusubaybayan ng mga doktor, mananaliksik, at opisyal ng kalusugan sa iba’t ibang estado.
Nauna nang iniulat ng The Washington Post na naantala ang naturang ulat, na sana’y magpapakita na ang COVID-19 vaccines ay nakapagpababa ng mga pagbisita sa emergency department at ospital ng humigit-kumulang kalahati sa nakaraang taglamig sa mga malulusog na matatanda.
Sa ilalim ng pamumuno ni Health Secretary Robert F. Kennedy Jr., na kilala bilang kritiko ng ilang polisiya sa bakuna, ilang rekomendasyon ukol sa COVID-19 shots ang binago ng isang advisory panel noong Setyembre, kabilang ang paglipat mula sa malawakang rekomendasyon tungo sa “shared decision-making” sa pagitan ng pasyente at healthcare provider. Ang naturang pagbabago ay pansamantalang pinahinto ng korte habang patuloy ang kaso.
Samantala, ang isyu sa publikasyon ay kasabay ng mga hamon sa pananaliksik sa COVID-19 vaccines matapos ihinto ng Pfizer at BioNTech ang isang malawakang clinical trial sa U.S. dahil sa mababang bilang ng kalahok, na nakaapekto sa pagkalap ng datos para sa mga regulator.
Patuloy namang nananatiling mahalagang produkto sa merkado ang COVID-19 vaccines, bagama’t bumaba na ang demand kumpara noong kasagsagan ng pandemya.
