Piglinaw ni US Secretary of State Marco Rubio na dae nakikipag-giyera an Amerika sa Venezuela.
Ini an sa ibong kan large-scale strike na piglunsar kan US sa kabisera kan Venezuela sa Caracas kan Sabado, Enero 3 na nagresulta sa pagkakaarestar ki Venezuelan President Nicolas Maduro asin First Lady Cilia Flores.
Naireport na kumitil an mga serye kan pagpapasabog kan Amerika sa kabisera kan 40 katao, kaibahan an mga sibilyan asin mga miyembro kan armed forces kan Venezuela, basado sa sarong dae pinangaranang senior Venezuelan official.
Kan Sabado man, pigkumpirmar ni Venezuelan interim leader Delcy Rodriguez na kaibahan sa mga nagadan sa strike kan US an mga sibilyan asin military personnel alagad mayong pigtao an opisyal na eksaktong numero.
Alagad sa panig kan US, pigtawan duon ni Rubio na bakong giyera an paglulunsar kan US kan strike sa Venezuela. Paliwanag pa kaini na nasa giyera an US kontra sa drug trafficking organizations alagad bako kontra sa Venezuela.
Pigsaysay man ni Rubio na mayong nakadeploy na US forces sa ground kan Venezuela.
Dugang pa kaini na premature o amay pa sa ngunyan an pagdaraos kan eleksiyon sa Venezuela.
Kan haputon man si Rubio kun tano dae muna pighagad an awtorisasyon kan US Congress antes isagibo an operasyon kan Amerika sa Venezuela, asin sinimbag kaining dae na kaipuhan, huli ta bako man ini sarong “invasion.”
Dae naman soboot ipapaaram sa kongreso an siring kaining operasyon huli ta ini pupwedeng ma-leak asin magkuriyat.
Pigladawan man ni Rubio an operasyon komo sarong law enforcement operation asin sinabing naarestar si Maduro sa ground kan mga ahente kan Federal Bureau of Investigation.
