Nakapuli na nin Pilipinas si Vice President Sara Z. Duterte makalihis an haros sarong bulan na pagtinir sa The Hague, Netherlands.
Sa impormasyon gikan sa Office of the Vice President (OVP), nag abot an Bise Presidente sa Ninoy Aquino International Airport (NAIA) kan nakalihis na aldaw nin Domingo, Abril 06 2025, bandang 9:56 nin pagkabanggi via Emirates Airlines flight no. EK 334.
Marurumdumang nagtinir si VP Sara Duterte sa The Hague, Kingdom of the Netherlands, magpun kan Marso 12 kasunod kan pagkaka-arestar sa saiyang ama na si dating Presidente Rodrigo Duterte na presenteng yaon sa International Criminal Court (ICC) detention facility huli sa kasong crimes against humanity.
Piglalaoman na sa mga masunod na aldaw maluwas nin mga pahayag an Bise Presidente sa nagkapira pang importanteng urulay o isyung kinakaatubang kaini ngunyan sa Office of the Vice President .
