NAGA CITY- Liwat na tinawan doon ni Vice President Leni Robredo na kaipuhang hanapan na kan Duterte Administration nin solusyon an pagsakit kan mga ordinaryong Pilipino.
Ini makalihis magpakol na sa 6.4% an inflation rate kan nasyon kan Agosto basado sa datos kan Philippine Statistics Authority (PSA).
Susog sa bise presidente, an halangkaw na inflation kumpirmasyon suboot kan saindang haloy ng patanid na kun mayong epektibong lakdang hale sa gobyerno, posibleng padagos pa an paglangkaw kan presyo kan mga pangenot na barakalon arog kan bagas.
Katakod kaini, hagad ni Vice President Robredo na iuntok na kan gobyerno an pagmenos sa epekto kan inflation asin an pagsasabing saro ini sa mga simbolo nin pag-uswag kan ekonomiya.
Sigon pa sa opisyal, dapat na gamiton na kan Duterte Administration an saindang poder sa paghahanap nin solusyon sa problema kan nasyon imbes na tutukan an mga lakdang na nagdadara nin pagkakawarak-warak, arog kan pagsasawarang-bisa sa amnestiya ni Senator Antonio Trilllanes na bistadong kritiko ni Presidente Rodrigo Duterte.
Imbes na maggibo nin paagi para mapasilencio an mga kritiko, dapat na gamiton suboot ining pagkakataon kan administrasyon para patotoohan na kaya nindang pababaon an presyo kan mga barakalon.
