Nagsayuma an Department of Foreign Affairs (DFA) na magtao nin detalye manungod sa kamugtakan ni dating Ako Bicol party-list Rep. Zaldy Co, na ibinaretang nasa France mantang kinakahampang an mga kasong konektado sa suboot anomaliya sa mga proyekto nin flood control.
Sa deliberasyon kan panukalang budget kan DFA, hinapot ni Akbayan party-list Rep. Perci Cendaña kun ano an kamugtakan ni Co sa France asin kun igwa nin timeline para sa saiyang pagbalik sa Pilipinas tanganing atubangon an mga kaso.
Segun ki Misamis Occidental Rep. Sancho Fernando Oaminal, na sponsor kan budget kan DFA, dai pwedeng iheras kan ahensya an detalye huli ta mahigot suboot na confidential sa irarom kan French law an mga asylum applications.
Idiniin man ni Cendaña na importante an papel kan DFA sa pagtabang na mapuli sa Pilipinas an mga tawong nasa ibang nasyon tanganing mapanagot sa mga kinakahampang nindang kaso.
Si Co kapwa akusado ni dating House speaker Martin Romualdez sa P7.4-bilyong plunder case na isinangat kan Ombudsman konektado sa suboot kickback scheme sa mga government infrastructure projects, kaiba an flood control.
Naghali sa nasyon si Co kan Hulyo 2025 asin dai pa nakakabalik sa Pilipinas.
