NAGA CITY – Pighayag ni Vice President Sara Duterte na bakong kawsa nin kaluyahan an saiyang pagbubutas komo sekretaryo kan Department of Education alagad komo malasakit sa mga paratukdo asin estudyante.
Ini an tinawan-duon kan Bise Presidente sa saiyang paghampang sa mga kagawad kan media kasuudma makalaihis na kumpirmaron an pagbubutas kaini sa cabinet position makalihis an 2 taong panunungkulan digdi.
Sigun ki VP Sara, pigsumiter kaini an saiyang resignation ki Presidente Ferdinand Marcos Jr. kan Hunyo 19 na pig-ako man kan Presidente. Ini an makalihis an 30 aldaw na notice para sa marhay na paglilipat nin kapangyarihan sa masunod na sekretaryon kan Kagawaran nin Edukasyon.
Sa nagin patara-tara ni VP Sara, sinaysay kaini na maski bako na ini an nagtitindog na sekretaryo kan edukasyon, magtitinir pa man ining nakasubaybay asin matindog sa derichos kan mga paratukdo asin mga estudyante sa nasyon.
Pinasalamatan man ni Duterte an mga partner agencies sa gobyerno, mga lokal na gobierno, private sector partners asin saiyang pigkokonsiderar nang pamilya sa DepEd. Dae naman sinabi kan Bise Presidente an dahilan kan saiyang pagbubutas komo DepEd Secretary.
Mientrastanto, apwera digdi, nagbutas man an bise Presidente komo Vice Chairperson kan National Task Force to End Local Communist Armed Conflict (NTF-ELCAC).
Kun marurumdoman, inisyal na mawot ni VP Sara na maitalaga komo sekretaryo kan Department of National Defense (DND) alagad itinao sa saiya kan Presidente an posisyon komo sekretaryo kan DepEd.
