Nagtutubod si World Boxing Council president Mauricio Sulaiman na magkakaigwa pa man nin init sa boxing ring an laban ni Filipino boxing icon Manny Pacquiao ki Mario Barrios.
Sinaysay kaini na mayo ining nahiling na pagbasol kan tugutan kaini si Pacquiao na hamunon si Barrios para sa welterweight title sa MGM Grand Las Vegas.
Pigheras kaini an mga paagi na ginibo kun saen an enot iyo an pagsasairarom sa medical examinations asin ini man an naisumiter tulos ni Pacquiao asin natawan man nin lisensiya gikan man sa commission.
An Nevada kaya an saro sa mga estado na may pinakamahigot asin pigbibistong boxing commission sa bilog na kinaban. Inaprubaran man kan WBC board an welterweight title fight ni Pacquiao ki Barrios.
Nagin emosyonal pa si Pacquiao kan apudan ini ni Sulaiman huli ta an enot na championship belt kaini sa WBC flyweight asin man ngunyan an challenger ini sa WBC welterwieght.
Pighali man ni Sulaiman an pagdududa ki Pacquiao huli sa edad kaining 46 anyos na kun saen sinasabing mayo na ining maibubuga.
Sinabi pa ni Sulaiman na an boxing an contact sports asin nahiling kaini si Pacquiao na mayo ining bisyo siring kan pag-inom nin arak na hasta sa ngunyan, marahay asin kondisyon pa man an lawas.
