NAGA CITY- Zero visibility na suboot ngonyan sa nagkapirang parte kan ciudad nin Ligao sa probinsya nin Albay makalihis an pagbuga na naman nin abo kan Mt. Mayon ngonyan na hapon.
Sa entrevista kan Bombo Radyo Naga ki P/Supt Morenzo Basia, hepe kan PNP Ligao, mahigot nindang binabantayan ngonyan an mga barangay kan Baligang, Amtik asin Tambo para masierto na mayong mga residente na nagtitinir digdi urog pa ta pigtaas na kan Philippine Institute of Volcanology and Seismology (PHIVOLCS) sa alert level 4 an bulkang Mayon.
Enot kaini, nagpuruli an nagkapirang mga pamilya na nag-ebakwar hale sa barangay Amtic makalihis na magkalma an nasambitang bulkan kan nakaaging aldaw.
Sigon ki Basia, nagdeploy na sinda nin mga pulis sa nasambitang tolong mga barangay para pabalikon sa mga evacuation centers an enot nang nagdecamp na mga residente.
Kun ilaladawan man, sigon ki Basia, maitom ngonyan an langit sa saindang lugar huli sa abo na ibinuga kan bulkan asin ‘zero visibility’ man suboot sa nagkapirang mga parte kan nasambitang ciudad.
Mientrastanto, sigon man sa PNP Camalig, nagpautob na suboot nin evacuation sa nagkapirang mga barangay sa banwaan nin Camalig makalihis na itaas na sa Alert Level 4 an bulkang Mayon.
